habaru page ad two

ރާއްޖެއަށް މަސްތުވާތަކެތި އެތެރެކޮށް، އެތަކެތީގެ ވިޔަފާރިކޮށްގެން ހޯދާ ފައިސާ ލޯންޑާކުރާ ނެޓްވޯކްތައް ހުއްޓުވުމަށް ދިވެހި ފުލުހުންގެ ޚިދުމަތުން ކުރިއަށްގެންދާ 'އޮޕަރޭޝަން އަލިމަގު' ގެ ދަށުން މާލޭ ސަރަހައްދާއި ގއ. އަތޮޅުގައި ޚާއްޞަ ހަރަކާތްތަކެއް މިއަދު ހެނދުނު ފަށައިފިއެވެ.

ދިވެހި ފުލުހުންގެ ޚިދުމަތުން ހާމަކުރެއްވި ގޮތުގައި، މިއަދު ހެނދުނު ފެށި މި އޮޕަރޭޝަނަކީ ގއ. އަތޮޅުގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކޮށް، މަނީ ލޯންޑަރިންގެ އަމަލުތައް ހިންގާކަމަށް ތުހުމަތު ކުރެވޭ ފަރާތްތަކަށް އަމާޒުކޮށްގެން ހިންގާ ހަރަކާތްތަކެކެވެ. މި އޮޕަރޭޝަންގެ މަޤްސަދަކީ މިފަދަ ނެޓްވޯކްތައް ހުއްޓުވައި، ގާނޫނީ ފިޔަވަޅުތައް އެޅުމެވެ.

މި އޮޕަރޭޝަންގެ ތެރެއިން ތުހުމަތުކުރެވޭ ފަރާތްތަކާއި ގުޅުންހުރި ތަންތަން ބަލައި ފާސްކުރުމުގެ މަސައްކަތް މިހާރު ދަނީ ކުރަމުންނެވެ. އަދި ގާނޫނު ތަންފީޒުކުރުމުގެ ގޮތުން އަޅަންޖެހޭ ހުރިހާ ފިޔަވަޅުތަކެއްގެ އަމަލީ މަސައްކަތްތައް ކުރިއަށްދާނެ ކަމަށްވެސް ފުލުހުން ވިދާޅުވިއެވެ.

މި މުހިންމު މަސައްކަތް ކުރިއަށްގެންދަނީ ސައުތު ޕޮލިސްގެ ޚާއްސަ ޓީމްތަކާއި، ފުލުހުންގެ އިންޓެލިޖެންސާއި، ޑްރަގް އެންފޯސްމެންޓް ޓީމުތައް ގުޅިގެންނެވެ.

'އޮޕަރޭޝަން އަލިމަގު' އަކީ މަސްތުވާތަކެތީގެ ވަބާއިން މުޖުތަމަޢު ސަލާމަތްކުރުމަށް ސިލްސިލާކޮށް ކުރިއަށްގެންދާ އޮޕަރޭޝަނެކެވެ. މި އޮޕަރޭޝަން މިހާތަނަށް ރާއްޖޭގެ 39 ރަށެއްގައި ހިންގާފައިވާކަން ފާހަގަކުރެވެއެވެ. މަސްތުވާތަކެތި އަތުލައިގަނެ، މި ނުރައްކަލުން ގައުމު ސަލާމަތްކުރުމަށް ސަރުކާރުގެ ކަމާބެހޭ ހުރިހާ އިދާރާތަކާއި ތަންފީޒީ އިދާރާތައް ގުޅިގެން ދަނީ ގިނަގުނަ މަސައްކަތްތަކެއް ކުރަމުންނެވެ.

މަސްތުވާތަކެތީގެ މައްސަލަތަކުގައި އަތުލައިގަންނަ ތަކެތީގެ އަދަދު އިތުރުވަމުންދާއިރު، ކޯޓު މަރުޙަލާގައި ފިޔަވަޅު އެޅުމުގައި ގިނަ ގޮންޖެހުންތަކެއް ހުރިކަން ފުލުހުން ފާހަގަކުރެއެވެ. މި ގޮންޖެހުންތަކަށް ހައްލެއް ހޯދުމަށްޓަކައި ކަމާގުޅޭ ހުރިހާ ފަރާތްތަކާއެކު މިހާރު ދަނީ މަޝްވަރާކުރެވެމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މަސްތުވާތަކެއްޗާ ދެކޮޅަށް ކުރާ މަސައްކަތްތައް ވަނީ އިތުރަށް ވަރުގަދަކޮށްފައެވެ.

އޮޕަރޭޝަން އަލިމަގު: މާލެއާއި ގއ.އަތޮޅުގައި ޚާއްޞަ އޮޕަރޭޝަންތަކެއް!

ކުރިއަށް އޮތް ބަރަކާތްތެރި ރަމަޟާން މަހާ ދިމާކޮށް، ބޭންކް އޮފް މޯލްޑިވްސް (ބީއެމްއެލް) އިން އަގުހުރި އިނާމުތަކެއް ލިބޭ ޚާއްޞަ ޕްރޮމޯޝަނެއް ކަމަށްވާ 'ރަން ފުރުޞަތު 2026' މިއަދު އިފްތިތާޙްކޮށްފިއެވެ.

މި މަހުގެ 10 ވަނަ ދުވަހުން ފެށިގެން އަންނަ މާރޗް މަހުގެ 16 ވަނަ ދުވަހުގެ ނިޔަލަށް ކުރިއަށްދާ މި ޕްރޮމޯޝަނަކީ، ބީއެމްއެލްގެ ކަސްޓަމަރުންނަށް ރޯދަ މަހުގެ ވިޔަފާރިތަކާއެކު ބޮޑެތި އިނާމުތަކެއް ހޯދުމުގެ ފުރުޞަތު ފަހިކޮށްދިނުމުގެ ގޮތުން ފެށި ޕްރޮމޯޝަނެކެވެ. މި މުއްދަތުގެ ތެރޭގައި ޕްރޮމޯޝަނުގައި ބައިވެރިވާ ފިހާރަތަކުން ވިޔަފާރިކުރާ ފަރާތްތަކަށް ކޮންމެ ހަފްތާއަކު ހޮވޭ އިނާމުތަކުގެ އިތުރުން، ޕްރޮމޯޝަން ނިމުމުން ހޮވާ ބޮޑު އިނާމު ހޯދުމުގެ ފުރުޞަތު ލިބިގެންދާނެއެވެ.

ބީއެމްއެލްއިން މަޢުލޫމާތު ދޭ ގޮތުގައި، މި ޕްރޮމޯޝަނުގައި ބައިވެރި ކުރެވޭނީ ބޭންކުގެ އިލެކްޓްރޯނިކް ވަޞީލަތްތައް ބޭނުންކޮށްގެން ކުރާ މުއާމަލާތްތަކެވެ. މީގެ ތެރޭގައި ބީއެމްއެލް ކާޑު މެޝިން (POS)، ސްޓެޓިކް ކިއުއާރު (Static QR) ނުވަތަ ބީއެމްއެލް ޕޭމަންޓް ގޭޓްވޭ މެދުވެރިކޮށް ކުރާ މުއާމަލާތްތައް ހިމެނެއެވެ.

ކޮންމެ ހަފްތާއަކު ކުރިއަށްދާ ގުރުއަތުލުމުގައި، ޕްރޮމޯޝަނުގައި ބައިވެރިވާ ފިހާރަތަކުން ހަފްތާއަކު މަދުވެގެން 500 ރުފިޔާގެ ވިޔަފާރިކުރާ ފަރާތްތަކުގެ ތެރެއިން 5 ނަސީބުވެރިއަކު ހޮވުމަށް ވަނީ ހަމަޖެހިފައެވެ. މިގޮތުން ހޮވޭ ކޮންމެ ނަސީބުވެރިއަކަށް 2,000 ރުފިޔާގެ ގިފްޓް ކާޑެއް ލިބޭނެއެވެ.

މި ޕްރޮމޯޝަނުގެ އެންމެ ޚާއްޞަ އިނާމަކީ ޕްރޮމޯޝަން ނިމުމުން ހޮވޭ ނަސީބުވެރިޔާއަށް ދިނުމަށް ހަމަޖެހިފައިވާ 100,000 ރުފިޔާގެ ގިފްޓް ކާޑެވެ. މި ބޮޑު އިނާމުގެ ގުރުއަތުގައި ބައިވެރިވެވޭނީ ޕްރޮމޯޝަންގެ މުއްދަތުގެ ތެރޭގައި ޖުމްލަ 10,000 ރުފިޔާއަށްވުރެ ގިނައިން ވިޔަފާރިކުރާ ކަސްޓަމަރުންނަށް ކަމަށް ބީއެމްއެލްއިން ވިދާޅުވިއެވެ.

ބީއެމްއެލްއިން އަބަދުވެސް މަސައްކަތް ކުރަމުންދަނީ ރޯދަ މަސް ފަދަ ޚާއްޞަ މުނާސަބަތުތަކާ ގުޅުވައިގެން ކަސްޓަމަރުންނަށް ފައިދާހުރި އަދި ޝައުގުވެރި ޕްރޮމޯޝަންތައް ކުރިއަށް ގެންދިއުމަށެވެ. މި ޕްރޮމޯޝަނުގެ ސަބަބުން ޑިޖިޓަލް ޕޭމަންޓްތަކަށް އިތުރު ހިތްވަރެއް ލިބި، ކަސްޓަމަރުންނަށް އަގުހުރި އިނާމުތަކެއް ހޯދުމުގެ މަގު ތަނަވަސްވެގެންދާނެއެވެ.

ބީއެމްއެލްއިން ރޯދައަށް ޚާއްޞަ 'ރަން ފުރުޞަތު' ޕްރޮމޯޝަން ފަށައިފި

ބައިނަލްއަޤްވާމީ ނިޒާމުގެ ތެރެއިން ކުދި ޤައުމުތަކުގެ މިނިވަންކަމާއި ސިޔާދަތު ރައްކާތެރިކުރުމަކީ އިންތިހާއަށް މުހިންމު ކަމެއް ކަމަށް ދިވެހިރާއްޖޭގެ ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ.

ޚާރިޖީ ވަޒީރު މިހެން ވިދާޅުވީ، ސޯމާލީލޭންޑަކީ ވަކި ދައުލަތެއްގެ ގޮތުގައި ބަލައިގަތުމަށް އިސްރާއީލުން ނިންމި ނިންމުމާ ގުޅިގެން މަޝްވަރާކުރުމަށް ސައުދީ އަރަބިއްޔާގެ ޖިއްދާގައި މިއަދު ބޭއްވި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ) ގެ ޚާރިޖީ ވަޒީރުންގެ 22 ވަނަ އެކްސްޓްރާއޯޑިނަރީ ބައްދަލުވުމުގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.

މި ބައްދަލުވުމުގައި ތަޤްރީރު ކުރައްވަމުން ޑރ. ޚަލީލް ވިދާޅުވީ، އިސްރާއީލުގެ މި ނިންމުމަކީ ސޯމާލިއާގެ މިނިވަންކަމާއި ސިޔާދަތަށް އުނިކަންލިބޭ، ބައިނަލްއަޤްވާމީ އުސޫލުތަކާ ކަނޑައެޅިގެން ޚިލާފު އަމަލެއް ކަމަށެވެ. އަދި އިސްރާއީލުގެ މިފަދަ ނިންމުންތަކާމެދު ދިވެހި ސަރުކާރުން ނުހަނު ކަންބޮޑުވާކަން ފާހަގަކުރައްވައި، މިއީ އދ. ގެ ޗާޓަރާވެސް ފުށުއަރާ ކަމެއްކަމަށް ވަޒީރު ވިދާޅުވިއެވެ.

މީގެއިތުރުން، މެދުއިރުމަތީގެ މަސްރަޙަށް އަލިއަޅުއްވާލައްވަމުން ޚާރިޖީ ވަޒީރު ވިދާޅުވީ، ފަލަސްތީނުގެ ބިންތަކުގައި އިސްރާއީލުން ހިންގަމުންދާ އަނިޔާވެރި އަމަލުތައް އިތުރުވެފައިވާ މި ދަނޑިވަޅުގައި، ބައިނަލްއަޤްވާމީ ޤާނޫނަށް އެ ޤައުމުން އިޙްތިރާމް ނުކުރާކަމީ ބޮޑު ކަންބޮޑުވުމެއް ކަމަށެވެ. ޚާއްސަކޮށް ޣައްޒާގައި ހަނގުރާމަ ހުއްޓާލުމަށް ބައިނަލްއަޤްވާމީ މުޖުތަމަޢުއިން ގޮވާލަމުންދާ ވަގުތެއްގައި، އިސްރާއީލުން ބައިނަލްއަޤްވާމީ ޤާނޫނާ ޚިލާފުވަމުންދާތީ އެކަން ވަޒީރު ވަނީ ހަރުކަށި އިބާރާތުން ކުށްވެރިކުރައްވާފައެވެ.

ވަޒީރު އިތުރަށް ފާހަގަކުރެއްވި ގޮތުގައި، ބައިނަލްއަޤްވާމީ ޤާނޫނީ ނިޒާމު ބަލިކަށިވުމަކީ ދިވެހިރާއްޖެ ފަދަ ބައިނަލްއަޤްވާމީ އުސޫލުތަކަށް ބަރޯސާވާ ކުދި ޤައުމުތަކުގެ ސަލާމަތާއި ރައްކާތެރިކަމަށް އޮތް ބޮޑު ނުރައްކަލެކެވެ.

އޯ.އައި.ސީ އަކީ 57 ޤައުމުގެ މައްޗަށް އެކުލެވިގެންވާ، މުސްލިމު އުއްމަތަށް ދިމާވާ ގޮންޖެހުންތައް ހައްލުކުރުމަށާއި ފަލަސްތީނުގެ ހައްޤުގައި ވަކާލާތުކުރާ އެންމެ ބޮޑު ޖަމުޢިއްޔާއެވެ. ދިވެހިރާއްޖެއިން 1976 ވަނަ އަހަރު މި ޖަމުޢިއްޔާގެ މެމްބަރަކަށް ވީީއްސުރެ، ރާއްޖެއިން ދަނީ މި ޖަމުޢިއްޔާގެ ހަރަކާތްތަކުގައި އިސް ދައުރެއް އަދާކުރަމުންނެވެ.

ކުދި ޤައުމުތަކުގެ ސިޔާދަތު ރައްކާތެރިކުރަން ރާއްޖެއިން ގޮވާލައިފި

މި ހިނގާ 2024 ވަނަ އަހަރުގެ ތެރޭގައި ރާއްޖޭގެ ފަތުރުވެރިކަމުގެ ސިނާއަތަށް އިތުރު ކުރިއެރުންތަކެއް ލިބި، އަލަށް 7 ރިސޯޓެއް ހުޅުވޭނެ ކަމަށް ފަތުރުވެރިކަމާއި ތިމާވެއްޓާ ބެހޭ ވުޒާރާއިން ހާމަކުރައްވައިފިއެވެ.

ފަތުރުވެރިކަމާ ބެހޭ ވުޒާރާއިން ވިދާޅުވި ގޮތުގައި، އަލަށް ހުޅުވޭ މި ރިސޯޓުތަކާއެކު ރާއްޖޭގެ ފަތުރުވެރިކަމުގެ އެނދުގެ އަދަދަށް ބޮޑު ކުރިއެރުމެއް އަންނާނެއެވެ. މިއަހަރު ހުޅުވުމަށް ހަމަޖެހިފައިވާ ރިސޯޓުތަކުގެ ތެރޭގައި ދުނިޔޭގެ މަޝްހޫރު ބްރޭންޑުތައް ހިމެނެއެވެ. އޭގެ ތެރޭގައި ރ. ރަންފުށީގައި ހުޅުވާ ބުލްގާރީ ބްރޭންޑުގެ ރިސޯޓާއި، ސިކްސް ސެންސަސް ކަނުހުރާ (ރަށްގިރި) އަދި ދިންމާގާ މޯލްޑިވްސް ފާހަގަކޮށްލެވެއެވެ.

މިދިޔަ އަހަރަކީވެސް ރާއްޖޭގެ ފަތުރުވެރިކަމަށް ކާމިޔާބު އަހަރެކެވެ. އެގޮތުން މިދިޔަ އަހަރު 6 ރިސޯޓެއް އަލަށް ހުޅުވާފައިވެއެވެ. އޭގެ ތެރޭގައި ކ. ބޮލިދުއްފަރުގައި ހުޅުވި މަންޑަރިން އޮރިއެންޓަލް މޯލްޑިވްސްއާއި، ހއ. މަކުނުދޫ ފަޅުގައި ހުޅުވި ސޮނޭވާ ސީކްރެޓް އަދި ބ. އަތޮޅުގެ ނިއުހީ އެޓް ދިގުފަރު ހިމެނެއެވެ. މީގެ އިތުރުން މާލޭގައި ހުޅުވި ފަސް ތަރީގެ ރަލް ރީފް ރިސޯޓު ބައި ބާސެލޯއާއި، ރިއު ޕެލަސް ރިސޯޓުވެސް ހިމެނެއެވެ.

ވުޒާރާގެ އެންމެފަހުގެ ތަފާސްހިސާބުތަކަށް ބަލާއިރު، މިދިޔަ އަހަރު ނިމުނުއިރު ރާއްޖޭގައި ހިންގާ ރިސޯޓުތަކުގެ ޖުމްލަ އަދަދަކީ 178 އެވެ. މިއާއެކު ރިސޯޓުތަކުގައި ހުރި ޖުމްލަ އެނދުގެ އަދަދު ވަނީ 44,697 އަށް އިތުރުވެފައެވެ. ރާއްޖޭގެ އެންމެ ގިނަ އެނދު ހުރީ މާލެ އަތޮޅުގައެވެ. އެއީ 13,500 އަށްވުރެ ގިނަ އެނދާއެކު މުޅި ރާއްޖޭގެ އެނދުގެ 31 އިންސައްތައެވެ. ދެވަނައަށް އެންމެ އެނދު ގިނަ އދ. އަތޮޅުގައި 5,800 އަށްވުރެ ގިނަ އެނދު (13 އިންސައްތަ) ހުރިކަން ފާހަގަކުރެވެއެވެ.

ފަތުރުވެރިން ޒިޔާރަތްކުރި އަދަދަށް ބަލާއިރު، މިދިޔަ އަހަރު ރާއްޖެއަށް 2,240,000 އަށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. މިއީ އޭގެ ކުރީ އަހަރާ އަޅާބަލާއިރު 200,000 ފަތުރުވެރިންގެ އިތުރުވުމެކެވެ. މީގެ އިތުރުން، މިދިޔަ އަހަރު ޒިޔާރަތްކުރި ފަތުރުވެރިން ވަނީ ރެކޯޑު އަދަދަކަށް ފައިސާ ހޭދަކޮށްފައެވެ. އެގޮތުން 5.4 ބިލިޔަން އެމެރިކާ ޑޮލަރު ފަތުރުވެރިން ހޭދަކޮށްފައިވާއިރު، މިއީ އޭގެ ކުރީ އަހަރާ އަޅާބަލާއިރު 15.8 އިންސައްތައިގެ ކުރިއެރުމެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަމާޒު ހިފާފައިވަނީ ރާއްޖޭގެ ފަތުރުވެރިކަން އިތުރަށް ފުޅާކޮށް، އިގްތިސާދީ ގޮތުން ރާއްޖެއަށް ލިބޭ ނަފާ އިތުރުކުރުމަށެވެ. މިއަހަރު ހުޅުވޭ އައު ރިސޯޓުތަކާއެކު މި އަމާޒަށް ވާސިލްވުމަށް ބޮޑު ބާރަކަށް ވެގެންދާނެއެވެ.

ރާއްޖޭގައި އިތުރު 7 ރިސޯޓު ހުޅުވަނީ

އިންތިޚާބުތަކުގައި މަސައްކަތްކުރާ އޮފިޝަލުން ތަމްރީންކުރުމަކީ ރައްޔިތުންނާއި ކެނޑިޑޭޓުންގެ އިންތިޚާބީ ހައްޤުތައް ކަށަވަރުކުރުމަށްޓަކައި ކުރަންޖެހޭ އެންމެ މުހިންމު އެއް މަސައްކަތް ކަމަށް އިލެކްޝަންސް ކޮމިޝަނުގެ ނައިބު ރައީސް ޢަބްދުއްރަޙްމާން ޞަލާޙު ރަޝީދު ވިދާޅުވެއްޖެއެވެ.

އޭނާ މިހެން ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް އޮފިޝަލުން ތަމްރީނުކުރާނެ "ޓްރެއިނަރުން" ބިނާކުރުމަށް ބޭއްވި ޕްރޮގްރާމް ނިންމުމުގެ ރަސްމިއްޔާތުގައެވެ. ސީއެޗްއެސްސީގައި މި މަހުގެ 3 އިން 9 އަށް ކުރިއަށް ގެންދިޔަ މި ތަމްރީނު ޕްރޮގްރާމުގައި 100 އަށްވުރެ ގިނަ ޓްރެއިނަރުން ވަނީ ތަމްރީނު ފުރިހަމަކޮށްފައެވެ.

މި ރަސްމިއްޔާތު ޝަރަފްވެރިކޮށްދެއްވާ ވާހަކަ ދައްކަވަމުން ނައިބު ރައީސް ޞަލާޙު ވިދާޅުވީ، މި ތަމްރީނުތަކުގެ ސަބަބުން އިންތިޚާބުގެ ކަންކަން އިތުރަށް ހަރުދަނާވެ، އޮފިޝަލުންނަށް ބޭނުންވާ ފަންނީ މަޢުލޫމާތު ފުރިހަމައަށް ފޯރުކޮށްދެވޭނެ ކަމަށެވެ. އަދި މިއީ ކެނޑިޑޭޓުންނާއި ވޯޓުލާ ފަރާތްތަކުގެ ޙައްޤުތައް ހިމާޔަތްކުރުމަށް އެޅޭ މުހިންމު ފިޔަވަޅެއްކަން އޭނާ ފާހަގަކުރެއްވިއެވެ.

"މައުލޫމާތު ރަނގަޅަށް ފޯރުކޮށްދެވިއްޖެނަމަ ރައްޔިތުންގެ އަދި ކެނޑިޑޭޓުންގެ ހައްގުތަކަށް އަރައިނުގަނެ މަސައްކަތްކުރެވޭނެ. ބައެއް ފަހަރު މީޑިއާތަކުގައި މަޢުލޫމާތު ފޯރުކޮށްދިނުމުގައި މާނަ އޮޅޭގޮތަށް ކަންކަން ހިނގާފައިވާތީ، އެކަމަށް ސަމާލުވާންޖެހޭ،" ޞަލާޙު ވިދާޅުވިއެވެ.

ލޯކަލް ކައުންސިލް އިންތިޚާބަކީ މަސައްކަތުގެ ގޮތުން އެންމެ ބުރަ އަދި އެންމެ ގިނަ ވަގުތު ހޭދަވާނެ އިންތިޚާބުކަން ފާހަގަކުރައްވަމުން ޞަލާޙު ވިދާޅުވީ، ގާތްގަނޑަކަށް 3 ލައްކައެއްހާ މީހުންނަށް ވޯޓުލުމުގެ ޙައްޤު ލިބިފައިވާއިރު، ކޮންމެ މީހަކަށް ގިނަ އަދަދެއްގެ ވޯޓު ކަރުދާސް ދޫކުރަންޖެހޭނެ ކަމަށެވެ. އެހެންކަމުން ވޯޓު ސައްހަވާނެ ގޮތްތަކާއި ފާހަގަޖަހާނެ ގޮތުގެ އިރުޝާދު ދިނުމުގައި ޓްރެއިނަރުންގެ ދައުރު ބޮޑުކަމަށް އޭނާ ވިދާޅުވިއެވެ.

މި ޕްރޮގްރާމް ނިންމި ޓްރެއިނަރުން ދެން ހަރަކާތްތެރިވާނީ ރާއްޖެއާއި ރާއްޖެއިން ބޭރުގެ ވޯޓުލާ މަރުކަޒުތަކުގައި މަސައްކަތްކުރާނެ އޮފިޝަލުން ތަމްރީނު ކުރުމުގައެވެ. އެގޮތުން، އިންތިޚާބަށް ބޭނުންވާ 7,000 އޮފިޝަލުން ތަމްރީނު ކުރުމުގެ މަސައްކަތް މި މަހުގެ 11 ވަނަ ދުވަހު އަތޮޅުތެރޭގައި ފެށުމަށް ވަނީ ހަމަޖެހިފައެވެ. އަދި މާލޭ ސަރަހައްދުގެ އޮފިޝަލުން ތަމްރީނު ކުރުން މި މަހުގެ 15 ގައި ފެށުމަށް އިލެކްޝަންސް ކޮމިޝަނުން ވަނީ ތާވަލުކޮށްފައެވެ.

މި ތަމްރީނުތަކުގައި ވޯޓުލާ ދުވަހުގެ އިޖުރާއަތްތަކާއި، މަރުކަޒުތަކުގެ އިންތިޒާމުތައް ބަލަހައްޓާނެ ގޮތުގެ ތަފްސީލީ މަޢުލޫމާތު އޮފިޝަލުންނަށް ފޯރުކޮށްދެވޭނެއެވެ.

އިންތިޚާބީ ޙައްޤުތައް ކަށަވަރުކުރަން އޮފިޝަލުން ތަމްރީންކުރުން މުހިންމު

ސްކޫލް ބަންދާ ދިމާކޮށް ކުލަބު ވެލެންސިއާ އެކެޑަމީގެ ފަރާތުން އިންތިޒާމުކޮށްގެން ކުރިއަށްގެންދާ "ސޮކާ ކޭމްޕް" އަށް ބޮޑު ތަރުހީބެއް ލިބެމުންދާކަން އެ ކުލަބުން ހާމަކޮށްފިއެވެ.

މި މަހުގެ 4 އިން 6 އަށް ހުޅުމާލޭގައި ކުރިއަށްގެންދާ މި ކޭމްޕަކީ 60 ވަރަކަށް ކުދިންނާއެކު ފެށި ކޭމްޕެކެވެ. ވެލެންސިއާ އެކެޑަމީން ބުނި ގޮތުގައި މިފަދަ ކޭމްޕެއް ބޭއްވުމުގެ މައިގަނޑު މަގްސަދަކީ ސްކޫލު ބަންދާ ދިމާކޮށް އެކެޑަމީތަކުގެ ގަވާއިދުން ބާއްވާ ތަމްރީނުތައް މަޑުޖައްސާލާފައިވާ ވަގުތެއްގައި، ފުޓުބޯޅަ ކުޅެން ބޭނުންވާ ކުދިންނަށް ބަންދު ތެރޭގައިވެސް އެ ފުރުސަތު ފަހިކޮށްދިނުމެވެ.

މި ކޭމްޕު ކުރިއަށްދަނީ ހަމައެކަނި ފުޓުބޯޅައިގެ ތަމްރީނުތަކަށް އެކަނި ބަލައިގެންނެއް ނޫނެވެ. ކުދިންގެ ހުނަރު ތަރައްގީކުރުމަށް ތަފާތު އެކި ހަރަކާތްތައް ވަނީ ހިމަނާފައެވެ. އޭގެ ތެރޭގައި މޫދުގައި ހިންގާ ހަރަކާތްތަކާއި، ޓްރެކްގައި ކުރިއަށްގެންދާ ހަރަކާތްތައް ހިމެނެއެވެ.

މި ކޭމްޕުގެ ހަރަކާތްތައް މުއްސަނދިވެގެންދަނީ ރާއްޖޭގެ ފުޓުބޯޅައިގެ ތަޖުރިބާކާރު ކޯޗުންގެ އިރުޝާދުގެ ދަށުންނެވެ. އެގޮތުން ފަސްޓް ޑިވިޝަނުގެ ކޯޗު މުހައްމަދު ނިޒާމް (ނިޒާމްބެ) އަދި ޕްރޯ ލައިސަންސް ކޯޗު މުހައްމަދު ޝާޒްލީ (ޝާޒް) ފަދަ ފުންނާބު އުސް ކޯޗުން ކުދިންނަށް އިރުޝާދު ދީފައިވާކަން ވެލެންސިއާއިން ފާހަގަކުރެއެވެ.

ވެލެންސިއާ އެކެޑަމީން މައުލޫމާތު ދިން ގޮތުގައި، މި ކޭމްޕުގައި ބައިވެރިވުމަށް ވަރަށް ގިނަ އަދަދެއްގެ ކުދިން އެދިފައިވެއެވެ. ނަމަވެސް ޖާގައިގެ ދަތިކަން ހުރުމުގެ ސަބަބުން މިފަހަރު ފުރުސަތު ދެވުނީ އެންމެ ފުރަތަމަ ކުރިމަތިލީ 60 ވަރަކަށް ކުދިންނަށެވެ.

"މިފަދަ ކޭމްޕުތަކުގެ ސަބަބުން ހުނަރުވެރި ކުޅުންތެރިން ފާހަގަކުރުމަށް ވަރަށް ބޮޑަށް ފަސޭހަވެގެންދޭ. އަދި ކުދިންގެ މެދުގައި އޮންނަ ގުޅުން ބަދަހިވެ، ކުޅިވަރުގެ ރޫހު އާލާވޭ،" ވެލެންސިއާ އެކެޑަމީން ބުންޏެވެ.

ކުލަބު ވެލެންސިއާއިން އިތުރަށް ބުނީ މިފަހަރުގެ ކޭމްޕަށް ލިބުނު ބޮޑު ތަރުހީބަށް ބަލައި، ކުރިއަށް އޮތް ތަނުގައިވެސް މިފަދަ ތަފާތު ހަރަކާތްތަކާއެކު ކޭމްޕުތައް ކުރިއަށް ގެންދިއުމަށް ވިސްނާފައިވާ ކަމަށެވެ.

ވެލެންސިއާ އެކެޑަމީގެ ސޮކާ ކޭމްޕަށް ބޮޑު ތަރުހީބެއް

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ "ޓެކްނޮލޮޖީ ސޮލިއުޝަންސް ޕްރޮވައިޑާސް" ގެ ގޮތުގައި މަސައްކަތް ކޮށްދޭނެ ފަރާތްތަކެއް ހޯދުމަށް އެ ކުންފުނިން އިޢުލާނުކޮށްފިއެވެ.

"ޓެކްނޮލޮޖީ ސޮލިއުޝަންސް ޕްރޮވައިޑާސް" އަކީ ވިޔަފާރިތަކަށް ކުރިމަތިވާ އެކި ކަހަލަ ގޮންޖެހުންތަކަށް ފަންނީ ހައްލު ހޯދައިދީ، އީޖާދީ އުފެއްދުންތައް މެދުވެރިކޮށް މަސައްކަތްތައް ހަރުދަނާކުރުމަށް އެހީތެރިވެދޭ ކުންފުނިތަކެވެ. މީގެ ތެރޭގައި މައިގަނޑު ގޮތެއްގައި ކްލައުޑް ކޮމްޕިއުޓިން، ސައިބަރ ސެކިއުރިޓީ، އާޓިފިޝަލް އިންޓެލިޖެންސް (އޭއައި)، ސޮފްޓްވެއަރ ޑިވެލޮޕްމަންޓް އަދި ނެޓްވޯކް އިންފްރާސްޓްރަކްޗަރ ފަދަ ދާއިރާތައް ހިމެނެއެވެ.

އެމްއޭސީއެލްއިން ކުރި އިޢުލާނުގައި ވާގޮތުން، މި މަސައްކަތަށް ހޮވޭ ފަރާތްތަކުން އަމަލުކުރަން ޖެހޭނީ އެ ކުންފުނިން އަންގާ ގޮތެއްގެ މަތިންނެވެ. މީގެ ތެރޭގައި ޓެކްނޮލޮޖީއާ ގުޅުންހުރި އެކި ޚިދުމަތްތައް ފަރުމާކުރުމާއި، ބިނާކުރުމުގެ އިތުރުން އެ ޚިދުމަތްތައް ދެމެހެއްޓެނިވި ގޮތެއްގައި ފޯރުކޮށްދީ ބެލެހެއްޓުން ހިމެނެއެވެ.

މި މަސައްކަތަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ ޝަރުތުތަކުގެ ތެރޭގައި، މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑްގައި ކުދި އަދި މެދުފަންތީގެ ވިޔަފާރިއެއްގެ ގޮތުގައި ރަޖިސްޓްރީވެފައިވުން ހިމެނެއެވެ. މީގެ އިތުރުން، އެ މަސައްކަތެއް ކުރާ ޓީމުގައި މަދުވެގެން 5 ދިވެހިން ހިމެނެންވާނެ ކަމަށްވެސް އެމްއޭސީއެލްއިން ވަނީ ބުނެފައެވެ.

މި ކަމަށް ޝައުޤުވެރިވާ ފަރާތްތަކުން އީމެއިލް މެދުވެރިކޮށް ޝައުޤުވެރިކަން ފާޅުކުރުމަށް އެ ކުންފުނިން ވަނީ އެދިފައެވެ. ޝައުޤުވެރިކަން ފާޅުކުރާއިރު އެ ފަރާތެއްގެ ފުރިހަމަ ނަމާއި، އެޑްރެސް، އީމެއިލް، ގުޅޭނެ ނަންބަރު އަދި ބޭނުންވާ އެހެނިހެން ލިޔެކިޔުންތައް ހުށަހަޅަންޖެހެއެވެ.

އެމްއޭސީއެލްއިން އިތުރަށް ހާމަކުރި ގޮތުގައި، ޝައުޤުވެރިކަން ފާޅުކުރާ ފަރާތްތަކުގެ ތެރެއިން ޝަރުތު ހަމަވާ ފަރާތްތަކަށް، ކުންފުނިން ބޭނުންވާ ހާލަތްތަކުގައި ކަނޑައެޅިފައިވާ އުސޫލުތަކުގެ ތެރެއިން މަސައްކަތްތައް ހަވާލުކުރަމުންދާނެއެވެ.

އެމްއޭސީއެލްއިން ޓެކްނޮލޮޖީގެ ކަންކަމަށް ޙައްލު ދޭނެ ބަޔަކު ހޯދަނީ

އަންނަ އޭޕްރިލް މަހު ބޭއްވުމަށް ތާވަލުކޮށްފައިވާ ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިޚާބުގައި ވޯޓުލުމުގެ ޙައްގު ލިބިފައިވާ މީހުންގެ ލިސްޓު އިލެކްޝަންސް ކޮމިޝަނުން އާންމުކޮށްފިއެވެ.

އިލެކްޝަންސް ކޮމިޝަނުން ހާމަކޮށްފައިވާ ތަފާސްހިސާބުތަކަށް ބަލާއިރު، އޭޕްރިލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ މި އިންތިޚާބުގައި ޖުމްލަ 294,937 މީހުންނަށް ވޯޓުލުމުގެ ޙައްގު ލިބިގެންވެއެވެ. މީގެ ތެރޭގައި ހިމެނެނީ 144,527 އަންހެނުންނާއި 150,410 ފިރިހެނުންނެވެ.

ކޮމިޝަނުން މިހާރު ވަނީ ވޯޓަރުންގެ ލިސްޓު އާންމުކޮށް، އެ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާފައެވެ. މި ލިސްޓު އިލެކްޝަންސް ކޮމިޝަނުގެ ވެބްސައިޓުންނާއި، ސަރުކާރުގެ ގެޒެޓުގެ އިތުރުން މާލެ ފިޔަވައި މީހުން ދިރިއުޅޭ ކޮންމެ ރަށެއްގެ ނުވަތަ ސިޓީއެއްގެ ކައުންސިލް އިދާރާތަކުން ފެންނަން ހުންނާނެއެވެ. އަދި ވޯޓުލާން ރަޖިސްޓްރީވެފައިވާ ތަން ބަލަން ބޭނުންވާ ފަރާތްތަކަށް 1414 އަށް 'VR (space) IDNO' ޖެއްސެވުމަށްފަހު އެސްއެމްއެސް ކޮށްގެންވެސް މައުލޫމާތު ސާފުކުރެވޭނެއެވެ.

ލިސްޓާ ގުޅޭގޮތުން އެއްވެސް ޝަކުވާއެއްވާނަމަ، މި މަހުގެ 18 ވާ އާދީއްތަ ދުވަހުގެ މެންދުރު 3:00 ގެ ކުރިން ކޮމިޝަނުގެ މައި ޕޯޓަލް މެދުވެރިކޮށް ހުށަހެޅުމަށް ވަނީ އެދިފައެވެ. ލިސްޓަށް މީހަކު އިތުރުކުރުން ނުވަތަ އުނިކުރުން ފަދަ ކަންކަމުގައި ޝަކުވާ ހުށަހަޅާއިރު، އެކަމުގެ ޞައްޙަކަން ސާބިތުވާނެ ރަސްމީ ލިޔުމެއް ހުށަހަޅަންޖެހެއެވެ. ސިޔާސީ ޕާޓީތަކުން ޝަކުވާ ހުށަހަޅަންޖެހޭނީ އެ ފަރާތްތަކަށް ޚާއްޞަކޮށްފައިވާ 'ސިމެދަ' ޕޯޓަލް މެދުވެރިކޮށެވެ.

މި އިންތިޚާބުގައި ރަށު ކައުންސިލްތަކަށް 626 ކައުންސިލަރުން އަދި ސިޓީ ކައުންސިލްތަކަށް 52 ކައުންސިލަރުން އިންތިޚާބު ކުރުމަށް ވަނީ ހަމަޖެހިފައެވެ. މީގެ ތެރޭގައި 133 ރަށަކުން 3 ކައުންސިލަރުން އަދި 46 ރަށަކުން 5 ކައުންސިލަރުން އިންތިޚާބު ކުރާނެއެވެ. ސިޓީ ކައުންސިލްތަކަށް ބަލާއިރު، މާލެ ސިޓީއަށް މޭޔަރާއެކު 18 ކައުންސިލަރުން، އައްޑޫ ސިޓީއަށް 11، ފުވައްމުލައް ސިޓީއަށް 9، އަދި ކުޅުދުއްފުށި ސިޓީއާއި ތިނަދޫ ސިޓީއަށް 7 ކައުންސިލަރުން އިންތިޚާބު ކުރާނެއެވެ.

އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކަށް މެންބަރުން އިންތިޚާބު ކުރާނީ އެ ރަށެއް ނުވަތަ ސިޓީއެއްގެ ކައުންސިލަށް އިންތިޚާބު ކުރާ އަދަދާ އެއްވަރަށެވެ. މި އިންތިޚާބަކީ ރާއްޖޭގެ ލާމަރުކަޒީ ނިޒާމު ހަރުދަނާކުރުމަށް ބޭއްވޭ މުހިންމު އިންތިޚާބެކެވެ.

ކައުންސިލް އިންތިޚާބުގައި ވޯޓުލުމުގެ ޙައްގު 294,937 މީހުންނަށް

ރާއްޖޭގެ ބޮޑު ސަރަޙައްދެއްގައި ދުރު ފެންނަ މިންވަރު ދަށްވެ، އާންމު ސިއްޙަތަށް ނުރައްކާވާ މިންވަރަށް ވައި ނުސާފުވެފައިވާތީ އެކަމަށް ސަމާލުވުމަށް މޫސުމާ ބެހޭ ޤައުމީ އިދާރާއިން (މެޓް އޮފީސް) މިއަދު އިލްތިމާސްކުރައްވައިފިއެވެ.

މެޓް އޮފީހުން ހާމަކުރެއްވި ގޮތުގައި، ރާއްޖޭގެ އުތުރާއި މެދުރާއްޖެތެރޭގެ ސަރަޙައްދުތަކުގައި މިއަދު ވައި ނުސާފުވެފައިވަނީ ސިއްޙަތަށް ނުރައްކާވާ މިންވަރަށެވެ. އެގޮތުން ރާއްޖޭގެ ސަރަޙައްދުގެ ވައިގެ ނުސާފުކަން މިހާރު ހުރީ "ރެޑް އެލާޓް" މިންގަނޑަށް އަރާފައެވެ. ކުރިއަށް އޮތް 6 ގަޑިއިރު ތެރޭގައިވެސް ވައިގެ ނުސާފުކަން ހުންނާނީ ނުރައްކާތެރި މިންވަރެއްގައި ކަމަށް ލަފާކުރެވޭތީ، ސިއްޙީ އެއްވެސް މައްސަލައެއް ނެތް މީހުންވެސް މިކަމަށް ސަމާލުކަން ދިނުމަށް އެ އިދާރާއިން ވަނީ އެދިވަޑައިގެންފައެވެ.

ވައިގެ ކޮލިޓީ ބަލަހައްޓާ ސިސްޓަމްތަކުން ދައްކާގޮތުގައި، ވިލިމާލޭގައި ހުންނަ ސިސްޓަމުން މާލެ ސަރަޙައްދުގެ ވައިގެ ނުސާފުކަން ހުރީ 193 ގައެވެ. އަދި ދ. ކުޑަހުވަދޫގައި ހުންނަ މޮނީޓަރިންގ ސިސްޓަމުން ދައްކާގޮތުގައި އެ ސަރަޙައްދުގެ ވައިގެ ކޮލިޓީ ހުރީ 162 ގައެވެ.

މެޓް އޮފީހުން ވިދާޅުވީ، ރާއްޖޭގެ ވައި ނުސާފުވެ، ދުރު ފެންނަ ނިސްބަތް ދަށްވެފައިވަނީ މިދުވަސްވަރަކީ އިރުވައި މޫސުން ކަމަށްވާތީ، ރާއްޖޭގެ އުތުރުން އިންޑިއާ އަދި ހިމާލިޔާ ސަރަޙައްދުން އަންނަ ފުސްދުމުގެ ސަބަބުން ކަމަށެވެ. މިއީ ކޮންމެ އަހަރެއްގެވެސް އިރުވައި މޫސުމުގައި ރާއްޖެއަށް ކުރިމަތިވާ މައްސަލައެކެވެ.

މޫސުމާ ބެހޭ ޤައުމީ އިދާރާއިން ލަފާކުރައްވާ ގޮތުގައި، ދުރު ފެންނަ މިންވަރު ރަނގަޅުވާން ފަށާނީ އަންނަ ހޮނިހިރު ދުވަހުގެ ފަހުންނެވެ. އެހެންކަމުން، ބޭރަށް ނުކުމެ އުޅޭއިރު މާސްކު އެޅުމަށާއި، ވައި ނުސާފުވުމުގެ ސަބަބުން ކުރިމަތިވެދާނެ ސިއްޙީ މައްސަލަތަކަށް ރައްކާތެރިވުމަށް ކަމާބެހޭ އިދާރާތަކުން އިލްތިމާސްކުރެއެވެ.

ރާއްޖޭގެ ވައި ނުސާފުވެ ޢާންމުން ސަމާލުވާން އެދިއްޖެ

ސަރުކާރުން ޙާފިޒުން ތަމްރީންކުރުމަށް ކުރަމުންދާ ޚާއްސަ މަސައްކަތްތަކާއެކު، ރާއްޖޭގައި މިވަގުތު ތިބި ޙާފިޒުންގެ ޢަދަދު 291 އަށް އަރާފައިވާކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އިސްލާމީ ކަންތައްތަކާބެހޭ ވުޒާރާއިން ހާމަކުރެއްވި ގޮތުގައި، މިއީ ރާއްޖޭގެ އިސްލާމީ ތާރީޚުގައިވެސް ފާހަގަކުރެވޭ ފަދަ ބޮޑު ކުރިއެރުމެކެވެ. ވަޒީރު ޑރ. ޝަހީމް ވިދާޅުވީ، މިހާރު މަސައްކަތްތައް ހުރި ގޮތުން ކުރިއަށް އޮތް ބަރަކާތްތެރި ރަމަޟާން މަހުގެ ކުރިން ރާއްޖޭގައި ތިބި ޙާފިޒުންގެ ޢަދަދު 300 އަށް އަރާނެ ކަމަށް އުންމީދު ކުރައްވާ ކަމަށެވެ.

ކީރިތި ޤުރުއާނަށް ލޯބިކުރާ މުޖުތަމަޢެއް ބިނާކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ނުހަނު އިސްކަމެއް ދެއްވާ ކަމެކެވެ. މިގޮތުން ޤުރުއާން ހިތުދަސްކުރާ ފަރާތްތަކަށް ހިތްވަރު ދިނުމުގެ ގޮތުން ދައުލަތުން ދޭ އެލަވަންސް ރައީސުލްޖުމްހޫރިއްޔާ ވަނީ ދެގުނައަށް ބޮޑުކޮށްދެއްވާފައެވެ. މީގެ އިތުރުން، ޙާފިޒުން ދަސްވެނިވުމަށް ޚާއްސަ ޙަފްލާތަކެއް ބޭއްވުމަށް ނިންމަވައި، އެކަން މިހާރު ވަނީ އަމަލީ ގޮތުން ފައްޓަވާފައެވެ. އެގޮތުން މިއަހަރުގެ ރަމަޟާން މަހުގެ 27 ވިލޭރޭ ބާއްވާ ޚާއްސަ ރަސްމިއްޔާތެއްގައި އަލަށް ދަސްވެނިވި 30 ޙާފިޒުންނަށް ތާޖު އެރުވުމަށް ވަނީ ހަމަޖެހިފައެވެ.

ސަރުކާރުގެ އަމާޒަކީ މި ހިނގާ 5 އަހަރުގެ ދައުރުގެ ތެރޭގައި ރާއްޖޭގައި ތިބި ޙާފިޒުންގެ ޢަދަދު 500 އަށް އިތުރުކުރުމެވެ. އިސްލާމީ ކަންތައްތަކާބެހޭ ވުޒާރާގެ ތަފާސްހިސާބުތަކުން ދައްކާގޮތުގައި، މިވަގުތުވެސް މާލެއާއި އަތޮޅުތަކުގައި 1500 އަށްވުރެ ގިނަ ކުދިންނާއި މީހުން ދަނީ ޤުރުއާން ހިތުދަސްކުރުމުގެ މަސައްކަތް ކުރަމުންނެވެ.

ޤުރުއާން ހިތުދަސްކުރާ ފަރާތްތަކަށް ރައީސުލްޖުމްހޫރިއްޔާގެ ޚާއްސަ މެޑަލް ދެއްވަން ފެއްޓެވީ 2014 ވަނަ އަހަރުގައެވެ. އޭރު އެ މެޑަލް ދެއްވަމުން ގެންދެވީ ހަމައެކަނި އެއްވަނަ ދަރަޖައިގައި ފާސްވާ ޙާފިޒުންނަށް ނަމަވެސް، މިހާރުގެ ސަރުކާރުން ވަނީ ޙާފިޒުކަމުގެ ސަނަދު ހާސިލްކުރާ ހުރިހާ ފަރާތްތަކަށްވެސް ރައީސުލްޖުމްހޫރިއްޔާގެ މެޑަލް ދެއްވާ ގޮތަށް ހަމަޖައްސަވާފައެވެ. އަދި މީގެ އިތުރުން، ޙާފިޒުންނަށް ހިތްވަރު ދިނުމުގެ ގޮތުން ސަރުކާރުގެ ޚަރަދުގައި ޢުމްރާގެ އަޅުކަން އަދާކުރުމުގެ ފުރުސަތުވެސް މިހާރު ދަނީ ފޯރުކޮށްދެމުންނެވެ.

ތާރީޚީ ކާމިޔާބީއެއް: ރާއްޖޭގައި ތިބި ޙާފިޒުންގެ ޢަދަދު 291އަށް

ރާއްޖޭގެ މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކޮށްފައިވާ ތަފާސްހިސާބުތަކުން ދައްކާގޮތުގައި، މިދިޔަ 2025 ވަނަ އަހަރު ރާއްޖެއިން ބޭރުކުރި މަހުގެ މިންވަރު އޭގެ ކުރީ އަހަރާ އަޅާބަލާއިރު 87 އިންސައްތަ އިތުރުވެއްޖެއެވެ.

އެމްއެމްއޭގެ މަންތްލީ ސްޓެޓިސްޓިކް ރިޕޯޓުގައިވާ ގޮތުން، 2025 ވަނަ އަހަރުގެ ޖަނަވަރީ މަހުން ފެށިގެން ނޮވެމްބަރު މަހުގެ ނިޔަލަށް ރާއްޖެއިން ވަނީ ޖުމްލަ 69,564 މެޓްރިކް ޓަނުގެ މަސް އެކްސްޕޯޓްކޮށްފައެވެ. މިއީ 2024 ވަނަ އަހަރުގެ އެ މުއްދަތުގައި އެކްސްޕޯޓްކުރި 37,213 މެޓްރިކް ޓަނާ އަޅާބަލާއިރު ބޮޑު ކުރިއެރުމެކެވެ.

މި ރިޕޯޓުން ދައްކާގޮތުގައި އެންމެ ބޮޑު ކުރިއެރުމެއް ލިބިފައިވަނީ ފިނިކުރި ނުވަތަ ގަނޑުކުރި މަސް އެކްސްޕޯޓްކުރި މިންވަރުންނެވެ. އެގޮތުން 2025 ވަނަ އަހަރުގެ ނޮވެމްބަރުގެ ނިޔަލަށް 61,281 މެޓްރިކް ޓަނުގެ ގަނޑުކުރި މަސް ބޭރުކޮށްފައިވާއިރު، މިއީ 2024 ވަނަ އަހަރުގެ އެ މުއްދަތާ އަޅާބަލާއިރު 105 އިންސައްތައިގެ އިތުރުވުމެކެވެ.

މީގެ އިތުރުން، ދަޅުގައި ނުވަތަ ޕައުންޗްގައި ބަންދުކޮށްގެން އެކްސްޕޯޓްކުރި މަހުގެ އަދަދުވެސް ވަނީ 9.4 އިންސައްތަ އިތުރުވެފައެވެ. އެގޮތުން 2025 ވަނަ އަހަރު 5,788 މެޓްރިކް ޓަނުގެ މަސް މިގޮތަށް ބޭރުކޮށްފައިވެއެވެ. އަދި ޕްރޮސެސްކޮށްގެން އެކްސްޕޯޓްކުރި މަހުގެ އަދަދު 34.9 އިންސައްތަ އިތުރުވެ، ޖުމްލަ 1,745 މެޓްރިކް ޓަނުގެ މަސް ވަނީ ބޭރުކޮށްފައެވެ.

ރާއްޖެއިން ބޭރުކުރާ މުދަލުގެ އެންމެ ބޮޑު ހިއްސާއެއް މަހުގެ ބާވަތްތަކުން އަދާކުރާއިރު، މަސްވެރިކަމުގެ ސިނާއަތުން އިގްތިސާދަށް ލިބޭ އާމްދަނީ އިތުރުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ މުހިންމު އަމާޒެކެވެ. މި އަމާޒަށް ވާސިލްވުމަށްޓަކައި މަސް ރައްކާކުރާ މިންވަރާއި ޕްރޮސެސިން ކެޕޭސިޓީ އިތުރުކުރުމުގެ މަސައްކަތްތައް ދަނީ ބާރުސްޕީޑުގައި ކުރިއަށެވެ.

މަސްވެރިކަމާ ބެހޭ ވުޒާރާއިން ހާމަކޮށްފައިވާ ގޮތުގައި، ސަރުކާރުގެ އަމާޒަކީ ކުރިއަށް އޮތް 3 އަހަރު ދުވަހުގެ ތެރޭގައި ރާއްޖޭގެ މަސް ޕްރޮސެސިން ކެޕޭސިޓީ 9 ގުނައަށް އިތުރުކުރުމެވެ. މިއީ ރާއްޖެއިން ބޭރުކުރާ މަހުގެ އަގު އެއްވަރެއްގައި ހިފެހެއްޓުމަށާއި، މަސްވެރިންނަށް ލިބޭ ނަފާ އިތުރުކުރުމަށް އެޅޭ މުހިންމު ފިޔަވަޅެއްގެ ގޮތުގައި ސަރުކާރުން ދެކެއެވެ.

މިދިޔަ އަހަރު ރާއްޖެއިން އެކްސްޕޯޓްކުރި މަހުގެ އަދަދު %87 އިތުރު

މާލޭގެ ގަލޮޅު ސައިރެކްސް ކޮލެޖް ކައިރީގައި ހުރި، ހަދަމުންދާ އިމާރާތެއްގައި މިރޭ އަލިފާނުގެ ހާދިސާއެއް ހިނގައިފިއެވެ.

މި ހާދިސާއާ ގުޅޭގޮތުން އެމްއެންޑީއެފުން ވިދާޅުވީ، އަލިފާން ރޯވެފައިވަނީ ގަލޮޅު ސައިރެކްސް ކޮލެޖް ކައިރީގައި ހުރި ހަދަމުންދާ އިމާރާތެއްގައި ކަމަށެވެ. މި ހާދިސާގެ ރިޕޯޓް މިރޭ 23:22 ހާއިރު އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބުމާއެކު، މާލޭ ފަޔަރ ސްޓޭޝަނުގެ ފަޔަރފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައެވެ.

އެމްއެންޑީއެފުން އިތުރަށް ވިދާޅުވި ގޮތުގައި، ފަޔަރފައިޓަރުން ކުރި މަސައްކަތުން އިމާރާތުގައި ރޯވެފައި ހުރި އަލިފާންގަނޑު ކޮންޓްރޯލް ކުރެވިފައިވަނީ 23:56 ހާއިރުއެވެ.

މި ހާދިސާގައި އެއްވެސް މީހަކަށް އަނިޔާއެއް ލިބިފައިވާ ކަމުގެ ރިޕޯޓެއް މިހާތަނަށް ލިބިފައި ނުވާ ކަމަށްވެސް އެމްއެންޑީއެފުން މައުލޫމާތު ދެއްވައެވެ. އެ ސަރަހައްދުގައި މިހާރު ސިފައިން ދަނީ ހަރަކާތްތެރިވަމުންނެވެ.

ސައިރެކްސް ކޮލެޖް ކައިރީ ހުރި ގެެއެއްގައި އަލިފާނުގެ ހާދިސާއެއް

ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ ރައީސްގެ މަޤާމަށް ކުރީގެ ވަޒީރު ޑރ. ޢާއިޝަތު ރަމީލާ އައްޔަން ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި މައްސަލަ ދިރާސާކުރުމަށް ރައްޔިތުންގެ މަޖިލީހުގެ ކަމާގުޅޭ ކޮމިޓީއަށް ފޮނުވައިފިއެވެ.

ރައީސުލްޖުމްހޫރިއްޔާ ފޮނުއްވި މި ހުށަހެޅުއްވުމާ ގުޅިގެން، އެ މައްސަލަ އިތުރަށް ދިރާސާކުރުމަށް މިއަދު ވަނީ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށް ފޮނުވާފައެވެ. އެޗްއާރުސީއެމްގެ ޤާނޫނު ބުނާގޮތުން، އެ ކޮމިޝަނަށް ރައީސަކު އައްޔަންކުރައްވާނީ ކޮމިޝަންގެ މެންބަރުންގެ ތެރެއިން، ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާއެވެ.

އެޗްއާރުސީއެމްގެ ރައީސްގެ މަޤާމު ހުސްވީ، އެ މަޤާމުގައި ކުރިން ހުންނެވި މަރިޔަމް މުނާގެ ދައުރު ހަމަވުމާ ގުޅިގެންނެވެ.

ޑރ. ޢާއިޝަތު ރަމީލާއަކީ މިހާރުވެސް އެ ކޮމިޝަންގެ މެންބަރެކެވެ. އޭނާ އެޗްއާރުސީއެމްގެ މެންބަރުކަމަށް އައްޔަންކުރުމަށް މަޖިލީހުން ފާސްކުރީ މިދިޔަ އޮކްޓޫބަރު މަހުގެ 29 ވަނަ ދުވަހުއެވެ. އަދި މަޤާމުގެ ފަތްކޮޅު އެރުވީ މިދިޔަ ޑިސެންބަރު މަހުގެ 3 ވަނަ ދުވަހުއެވެ.

ޑރ. ރަމީލާއަކީ މި ސަރުކާރުގެ ފުރަތަމަ ދަނޑުވެރިކަމާއި ދިރޭތަކެއްޗާ ބެހޭ ވަޒީރެވެ. ނަމަވެސް، ޞިއްޙީ ޙާލުކޮޅު ހުރިގޮތުން 1 ޑިސެންބަރު 2024 ގައި އެކަމަނާ ވަނީ ވަޒީރުކަމުގެ މަޤާމުން އިސްތިއުފާ ދެއްވާފައެވެ.

ޖުމްލަ 5 މެންބަރުންގެ މައްޗަށް އެކުލެވޭ އެޗްއާރުސީއެމްގައި މިހާރު ތިއްބަވަނީ ކޮމިޝަންގެ ނައިބު ރައީސް މުޙައްމަދު ޝަފީޤް މަޙްމޫދާއި، މެންބަރު ސަމާޢު އަޙުމަދު ނަޖީބާއި، އިސްމާއިލް ޙަބީބާއި އަޙްމަދު މަޤުސޫމް އަދި ޑރ. ޢާއިޝަތު ރަމީލާއެވެ.

މަޖިލީހުގެ ކޮމިޓީން ޑރ. ރަމީލާގެ ނަން ދިރާސާކޮށް ނިންމުމުން، އެ ނަން ފާސްކުރުމަށް އަލުން މަޖިލީހުގެ ތަޅުމަށް ހުށަހެޅޭނެއެވެ.

ޙަބަރު